Demirtaşik na metçopu do Demirtaşite na nitçopu Fursethepe

16.07.2014 Vatan
Çeviren: İrfan Çağatay Aleksishi /
Orjinal Metin (tr-16.7.2014)

“Otva-molaşineri” Ekmeleddin İhsanoğlu pholithiqaşen va mulun, isinapamthaşa pholithiquri sthili oxmaruşe geri dizden, nomalurot AKP-a rei na meçaserthu goşamtsxunu muşi qale molaonu guris na uğunşeni varti AKP-şi xetsala varti AKP-şi molaşineri Erdoğani dasvthura qaphethi qaphethi var uqathiğors. Haya tzori sthrateji reni vana var, hea 10 Mariaşinaş lumcis oxovotzonaten. Mara andğaşen votzqedatşi, İhsanoğluşi ham sthrateji gurişeni Cumhurbaşkanlığişi goşaonupes Erdoğaniqala pholithiquri oqotçişinus HDP-şi Malamture Tigemçanu Selahattin Demirtaşi xvala na doskidu idziren.
Haya, soğunuri orapes pholithiquri kianas murutsxi na uprandu timya ar coxo na ren Demirtaşişeni beciti ar fursethi ren. Demirtaşis CHP+MHP-şi molaşineri goşatsxunumthesşa na eçkindu umutobas apşasna HDP, hekolen gyotçqa do Kyurduri PHolithiquri Oxoqanu (KPO) ağne svalepeşa azdinasen. Mara, mtel fursethepes na rensteri hayasti risqepe koren.
Ham thimbis etzağaru beciti domatzonen: Demirtaşik KPO na moşiğu pholithiquri ar figura ren. Andğas timuşis nethi na idziren ozguvenis, KPO-k muqo tzana na noums mucadele do andğaneri ndğas na malu thimbişi pai did ren. Demirtaşik, ağne qomathepes gamaxtimuş gurişeni egre Kyurdi goşamtsxunu uci elvoğasna n ava meşonums anosthe surprizepe komuxvadun. Qampanyas kankas na geladzin ham denge uqatalaseren, mara hatzişakis Kyurduli minoba oqozumaşqule mtsika uci elvoğes-ma do vizmor.

Laisizmiş Fakthori
Prof. İhsanoğlu, mşinaxoba minoba na uğun do haya na ompulamu var do iri muxvadasi na etzuğarams ar qoçi ren. Asti CHP do MHP-ti himu ham doxmelobape muşişeni na goşiones ignapinen. Mara Erdoğani va goşionas-ya do mşinaxoburi ar molaşineri goladgitinu noqo ğnosuri ar dulya ren, haya peği var oqobisinapit. Ham soğunari tzanapes OŞkanda-Yulvas çkva do çkva İslamuri grubpeşi aras na noums phothe na var içoden limaş gurişeni İslamizmis tamo tamo xirsişa na colams mole komoviğidorthun. Haya tzalonaşkunisti memavineran do matkvenan ki, Güleniş cemaethi do AKP-şi lima, dindarepe raatsuzi tzopxums do İslami pholithiqaşqala dido na elişinenşeni laisizmi ağneşen metimoni iven. Atxeneri "laikçilik" na utzomenan na nobadzgams fikrepeşen çkvaneri, moderni do oxoşkveruri laisizmiş yorumepeşeni bzophon pha.
Hakolen otzqedasis CHP-s çkar varna ham phrosesis dido bedi na var uğun oxitzoninen. Arti xolo CHP-şi maktalepes İslamuroba hatzi na ren phathi xalişen ambai na uğunti va matkvenan. Heya heşo rennati, KPO İslamoba mu xalis na ren n oxvotzonu, Suries do gverda gverda İrağis El-Qaide do himuşe eçkinderepeşqala na ikums pelaperi oqotçişinaşen oxovotzonamt. E do, soğunu Demirtaşik, jur mşinaxoburi molaşinerişeni, dozi muşi qaixeşa qameri ar laisizmiş tkvala dvatişasna, hamuşi qai faydape oşkendani do gundze orapesti dzirasen.

Barajişi Osincu
HEPişen doni muqo do muqo pardi golaxtu, hantepe svaluri do generaluri seçimepeşa kamaxtes, mara generaluri goşaonupeşi %10 phrosenthişi barajiş gurişeni phothe KPO-şi mtsxade rei odziruşi fursethi var ivu. Demirtaşişi molaşineroba ham varoçkinuri xaliti epto oçodinasen do HDP-şi 2015-s generaluri goşaonupeşa muşi coxoten amaxtaseni vana var, heati 10 Mariaşinaş lumcis nethi ivasen. Hatzişen ogi Tarhan Erdemis, BDP % 10 phrosenthi na golvalinasen mole moğudorthun do peği miti var acerinudorthun. Mati va macerudorthun. Mara açkva andğaneri ndğas HDP-şi mencelis na nuntçuşun, Demirtaşişi molaşinerobateti haya daati na iqolayu-ma viduşur.
Majura qele Demirtaşişi molaşineroba Kyurduri PHroblemişi getzqala do xolo Türkieşi bedişeniti ar qai fursethi ren. Hemuşeni ki, zathi gentzqalaş phrosesite qai qai na lobu atmosferişeniti dido muxvadun Demirtaşişi coxo: Muşi quçxepes gedgin, na gotzudgunpes burgulişa va gyondriqapams. Va noqixams mara aliti va geiğams.
Do pholithiqa ikums.

Destek olmak ister misiniz?
Doğru haber, özgün ve özgür yorum ihtiyacı
Bugün dünyada gazeteciler birer aktivist olmaya zorlanıyor. Bu durum, kutuplaşmanın alabildiğine keskin olduğu Türkiye'de daha fazla karşımıza çıkıyor. Halbuki gazeteci, elinden geldiğince, doğru haber ile özgün ve özgür yorumla toplumun tüm kesimlerine ulaşmaya çalışmalı ve bu yolla, kutuplaşmayı artırma değil azaltmayı kendine hedef edinmeli. Devamı için

Son makaleler (10)

19.11.2024	Nihayet birilerinin beklediği ve umduğu gibi Devlet Bahçeli geri adım mı attı?
10.11.2024	Abdullah Öcalan’a sormak istediğim 20 soru
10.11.2024	Hasan Cemal ile söyleşi: Zamâne Diktatörleri
07.11.2024	Burak Bilgehan Özpek ile söyleşi: Bahçeli DEM Parti açılımından ne umuyor, ne bulabilir?
06.11.2024	Transatlantik: Trump nasıl kazandı? Türk-Amerikan ilişkileri nereye?
05.11.2024	Hatem Ete ile söyleşi: Bahçeli ile Erdoğan ayrışıyor mu?
03.11.2024	Fethullah Gülen öldüğüyle kaldı
01.11.2024	Ruşen Çakır ve Kemal Can ile Haftaya Bakış (239): Esenyurt Belediyesi’ne kayyum atandı - CHP ne yapacak?
30.10.2024	Transatlantik: ABD seçimlerine son 5 - Türkiye’de çözüm süreci tartışmaları İsrail’in İran’a cevabı
27.10.2024	Ertuğrul Özkök niçin Fethullah Gülen’i çok sevmişti?

19.11.2024		Nihayet birilerinin beklediği ve umduğu gibi Devlet Bahçeli geri adım mı attı?
22.09.2024		Ruşen Çakır nivîsî: Di benda hevdîtina Erdogan û Esed de
17.06.2023		Au pays du RAKI : Entretien avec François GEORGEON
21.03.2022		Ruşen Çakır: Laicism out, secularism in
19.08.2019		Erneute Amtsenthebung: Erdogans große Verzweiflung
05.05.2015		CHP-şi Goşaonuş Sthrateji: Xetselaşi Coxo Phri-Elişina Mualefeti
03.04.2015		Djihadisti I polzuyutsya globalizatsiey I stanovitsya yeyo jertvami. Polnıy test intervyu s jilem kepelem
10.03.2015		Aya Ankara Az Kobani Darse Ebrat Khahad Gereft?
08.03.2015		La esperada operación de Mosul: ¿Combatirá Ankara contra el Estado Islámico (de Irak y el Levante)?
18.07.2014		Ankarayi Miçin arevelki haşvehararı